Ang mataong barangay ng Bilolo ay dating sitio ng barangay San Vicente. Noong panahon ng pananakop ng mga kastila, may isang babae na naglalako ng PALIDOSDOS o BILO-BILO na upang makapagbenta ay nalilibot ang bayan ng Orion, na hanggang sa mapadako ang babae sa mataas na lugar (upland) na noong panahong iyon ay madalang pa ang naninirahan.

Na sa paglalako ng BILO-BILO ay nakaramdam ng pagod ang babae kung kaya’t nagpahinga ang babae sa gilid ng daan at sa kanyang pagpapahinga ay may mga lalaking kastila ang napadaan sa kanyang pinagpapahingahan at nang mapatapat ay inalok ang mga kastila ng kanyang paninda na BILO-BILO.

Na sa halip na bumili ng BILO-BILO ay nagtanong sa wikang kastila ang isa sa kalalakihan na ang sinabi ay “ANONG LUGAR ITO, ANONG PANGALAN NG LUGAR NA ITO?” at sa pagtatanong ay sabay turo ng daliri pababa, at dahil sa paniwala ng babae ay tinatanong ang kanyang paninda kaya’t sinabi niya na BILO-BILO PO, paulit-ulit na sinabi ng babae ang BILO-BILO.

Na sinambit ng kastila na “AH BILO-BILO” at sabay umalis ang mga kastila at mula noon ay tinawag na ang lugar na BILO-BILO hanggang sa paglipas ng panahon ang BILO-BILO ay tinawag ng BILOLO.

Mula sa panahon ng kastila, hanggang sa matapos ang Ikalawang Pandaigdig na Digmaan, ang Barangay Bilolo ay nararating lang sa pamamagitan ng ilang mga Dakdak(Trail)  na nag-uugnay sa pangunahing daan ng Orion(Bataan National Road), at noong taong 1957 ay kinilala ang Bilolo bilang lihitimong barangay ng Orion.